ნეტბუკები (NetBook), იგივე "ინტერნეტ ტერმინალები", ანუ სუსტი, ძირითადად ელ.ფოსტის, ჩატისა და ინტერნეტში სეირნობისთვის განკუთვნილი მცირე ზომის ნოუთბუქები ბაზარზე გამოჩენის დღიდან ძალიან პოპუალრულები არიან. რა სუსტი და მცირე ზომისაც არ უნდა იყოს, ნეტბუკიც კომპია და თავისი ოპერაციული სისტემა სჭირდება. აქ კი MS, რაც არ უნდა გასაკვირი იყოს, ძალიან დიდი ანგარიშით აგებს ლინუქსთან.

ბევრი საუბრობს იმაზე, რომ ნეტბუკებმა ლინუქს სამყაროს ახალი სული შთაბერა. მოდულარულობა და მორგებადობა, რაც ამ სისტემას "გენებში აქვს", განსაკუთრებით მოსახერხებელია, როცა სუსტი კომპისთვის განკუთვნილი ნაკლებად მომთხოვნი და მხოლოდ საჭირო კომპონენტებისგან აწყობილი სისტემა გვჭირდება,  ძველი, საყვარელი XP და, მით უმეტეს, გაბერილი Vista კი ძალიან აგებენ სპეციალურად ამ პლატფორმისთვის შექმნილ (ან ცნობილ და პლატფორმაზე მორგებულ) ლინუქსის დისტრიბუციებთან (Xandros, Ubuntu Netbook Remix, gOS და ა.შ.). არადა ნეტბუკების ბაზარი დღითიდღე იზრდება და რა გასაკვირია, რომ MS-იც მეტი და მეტი მონდომებით ცდილობს მის ხელში ჩაგდებას.

ამიტომ გაოცება გამოიწვია MS-ის განცხადებამ - ის არ აპირებს სპეციალიზირებული OS გამოუშვას ნეტბუკებისთვის (იხილეთ ბმულები), რადგანაც Win7 (მათი განცხადებით) თავისუფლად შეძლებს სწრაფად და მსუბუქად იმუშავოს ამ პლატფორმაზე. განცხადება ნამდვილად თამამია, თუ გავიხსენებთ Vista-ს კრახს, მაგრამ იმედისმომცემიც, თუ Win7-ის ბეტას წარმატებებს (ან Asus-ის განცხადებას, რომ მისი ნეტბუკები Win7-ზე იმუშავებენ) გავითვალისწინებთ.

როგორც ყოველთვის, ახლაც გამოჩნდა ჯგუფი ენთუზიასტებისა, რომლებმაც მოახერხეს, მოვლენებისთვის გაესწროთ და კარგად ნაცნობი Win7-ის ბეტა ვერსია Sony VAIO P სერიის ნეტბუკზე დაეყენებინათ. ამჯერად ეს ხალხი ცნობილი ტექნოლოგიური ბლოგის, Engadget-ის თანამშრომლები აღმოჩნდნენ.

მათი შეფასებით, Win7 შესანიშნავად მუშაობს აღნიშნულ ნეტბუკზე, მწყობრშია თითქმის ყველა კომპონენტი (Wi-Fi-ს ჩათვლით), სისტემა სწრაფად რეაგირებს ყველა ბრძანებაზე და საერთო ჯამში, ძალიან კარგ შთაბეჭდილებას ტოვებს. ერთ მინუსად აქამდე რჩება Aero - მისი ამუშავება არ მოხერხდა.

ინფორმაცია დეტალებში შეგიძლიათ იხილოთ თავად Engadget-ზე: VAIO P, now with more Windows 7

ორიოდე ბმული დამატებით:

It's official: Microsoft won't release a netbook version of Windows 7 @ Computerworld

NetBook @ Wikipedia

ბეჭდვითი ვერსია