ალბათ გაგიგონიათ Wii-ს შესახებ, მისი პოპულარობა მთლიანად განპირობებულია იმით, რომ გააჩნია რამდენადმე "ბუნებრივი" კონტროლერი, მაგალითად, შეიძლება ჯოისტიკის აქეთ-იქით ქნევა ან გვერდზე გადახრა და კონსოლი ამ ყველაფერს გაიგებს! ეს დიდ შესაძლებლობებს იძლევა თამაშისას, მაგალითად, შეიძლება ჯედაის როლი მოირგოთ და თქვენი ვირტუალური ხმალი მთლიანად გაიმეორებს ჯოისტიკის მოძრაობას ან კიდევ ბეისბოლის მატჩი ითამაშოთ ისევ ბუნებრივი მოძრაობით - ჯოისტიკი ამჯერად ბეისბოლის კეტის როლს შეასრულებს. მაგრამ მიუხედავად მთელი ეფექტისა, Wii-ს მხოლოდ თქვენი ხელის მოძრაობის დაჭერა შეუძლია (ამ დროს ჯოისტიკი ხელში უნდა გეჭიროთ), სხეულის სხვა ნაწილების გაკონტროლება მას არ შეუძლია.
ის, რაც ახლა უნდა ნახოთ, Wii-ს მოძველებულ და უსარგებლო ნივთად მოგაჩვენებთ! გაიცანით Natal, XBOX-ის დამატება, რომელიც საშუალებას გაძლევთ, ითამაშოთ ყველანაირი კონტროლერის გარეშე, მხოლოდ საკუთარი სხეულის, ხმის და ჟესტების დახმარებით!
სადემონსტრაციო კლიპში შეგიძლიათ ნახოთ, როგორ თამაშობს მთელი ოჯახი ფორმულა 1-ის ჩემპიონატს (გოგო ატარებს მანქანას, მამა პიტ-სტოპებზე საბურავებს ცვლის, დანარჩენები გულშემატკივრობენ :-)), როგორ ებრძვის ბიჭი ვირტუალურ კარატისტს, როგორ თამაშობს ორი ოჯახი თამაშს "რვანი" (ჰმ, იმათაც ჰქონიათ) ერთმანეთის წინააღმდეგ და როგორ თამაშობს დედა-შვილი პენალტების სერიას ერთი დამრტყმელის, მეორე კი მეკარის როლში და ეს ყველაფერი ჯოისტიკის გარეშე!
Natal-ს სახის ამოცნობაც შეუძლია. ზუსტად ესაა ერთ-ერთი მთავარი შესაძლებლობა - იმისთვის, რომ თქვენს XBOX პროფილში შეხვიდეთ, მხოლოდ Natal-ის სენსორის (შავი გრძელი ყუთი სურათზე) წინ დადგომაა საჭირო. მოწყობილობა ავტომატურად ამოიცნობს თქვენს სახეს და ავტორიზაციას გაგატარებთ სისტემაში.
ეს რა იყო ტო