WWDC-მდე რამდენიმე დღით ადრე მიმომხილველ ონლაინ-ჟურნალებსა და ბლოგებზე ატეხილ აჟიოტაჟში ერთი რამ ისმოდა მკაფიოდ - Apple წარმოადგენდა ახალ iPhone-ს, ამაში თითქმის ყველა თანხმდებოდა. და ასეც მოხდა. ორშაბათს გამართულ WWDC 2009-ზე Apple-მა ერთ-ერთი მთავარი სიახლე, iPhone 3G S, იგივე iPhone 3G Speed წარმოადგინა. ეს რიგით მესამე iPhone გახლავთ.

მაგრამ, იგივე ბლოგერთა და ჟურნალისტთა დიდი მოლოდინი არ გამართლდა, iPhone-მა ოდნავადაც არ შეიცვალა გარეგანი მხარე (ფერი, ზომა და ლამის წონაც კი უცვლელია), არც რკინეულობის და არც სოფტის დონეზე გარდა ერთისა - უკანა მხარეს სმარტს ემჩნევა პატარა წარწერა - 32GB (თუმცა ამაზე ქვემოთ). არანაირი OLED ეკრანი (რომელიც Zune HD-ს აქვს და რომლითაც Engadget-ის გუნდი აღფრთოვანებული დარჩა) და მეორე კამერა მესამე თაობის ზარებისა და iChat-ის ვიდეო ზარებისთვის.

დავანებოთ თავი იმედგაცრუებებს და ვნახოთ, რა მოგვიტანა ახალმა iPhone-მა:

• პირველ რიგში უნდა აღინიშნოს, რომ ახალი iPhone გაიყიდება ორ, 32GB და 16GB ვარიანტში.
• როგორც იქნა, Apple-მა მოაბა თავი ვიდეო კამერას და 3G S-ს შეუძლია ვიდეოკლიპების გადაღება (30 fps VGA ავტოფოკუსით და სინათლის ავტობალანსით) და მათი ბაზისური რედაქტირება
• კამერის სიახლეები ამით არ შემოიფარგლება, სმარტს ახალი 3 მეგაპიქსელი გარჩევადობის მქონე კამერა აქვს, აღჭურვილი ავტოფოკუსით და სინათლის ავტობალანსით. ძალიან კარგადაა განხორციელებული ხელით ფოკუსირება - უბრალოდ დააჭირეთ თითი კამერიდან მიღებულ გამოსახულებას და კამერა იმ ადგილას გააკეთებს ფოკუსირებას (მაკრო რეჟიმი ავტომატურად ირთვება ახლოს მდებარე საგნებზე ფოკუსირებისას)
• შესაძლებელია გადაღებული ფოტო-ვიდეო მასალის გეოტეგირება და კამერის ფუნქციონალობა ნებისმიერი პროგრამისთვისაა მისაწვდომი, რაც ახალ ჰორიზონტებს ხსნის iPhone-ის პროგრამებისთვის
• როგორც იქნა, iPhone-ს აქვს Voice Dialing-ის მხარდაჭერა. შესაძლებელია ხმით დარეკვა რომელიმე კონტაქტთან ან დასარეკი ნომრის ხმით, ციფრ-ციფრ კარნახი, ასევე შესაძლებელია iPod-ის ხმით მართვა
• S ნიშნავს Speed-ს, Speed კი მოწყობილობას ეწოდა მისი გაუმჯობესებული მახასიათებლების გამო: iPhone-ს ახლა  7.2 Mbps 3G სტანდარტის მხარდაჭერა აქვს, რამაც თეორიულად და პრაქტიკულად 3G ქსელებში უფრო მეტი სიჩქარე უნდა მოგცეთ
• ეკრანმა მიიღო ახალი მტვრისგან დამცავი შრე, საინტერესოა, პრაქტიკულად რამდენად მოსახერხებელი იქნება ეს
• ძალიან საინტერესო სიახლე - მაგნეტომეტრი, რომელიც საშუალებას იძლევა, ტელეფონი კომპასად გამოვიყენოთ (იხ. სურათი), ასევე საშუალებას იძლევა Google Maps-ში მდებარეობასთან ერთად ზუსტად დადგინდეს თქვენი მიმართულება, მოსახერხებელია.
• ძლიერი ბატარეა! Apple-ის მიხედვით, ბატარეა საკმარისი იქნება ან 12 საათი ლაპარაკისთვის 2G ქსელებში, ან 5 საათისთვის 3G-ში, ან 9 საათი სერფინგისთვის Wi-Fi ქსელებში ან 300 საათი უქმად ყოფნისთვის
• iPhone-ის რკინეულობამაც მიიღო დაუზუსტებელი სახის განახლება, რომელიც საშუალებას აძლევს 3G S-ს, გახსნას, დახუროს ან გადაერთოს პროგრამებს შორის პრაქტიკულად შეფერხების გარეშე, Safari კი ამ განახლების წყალობით გვერდებს 2.1-ჯერ უფრო სწრაფად არენდერებს.

დანარჩენი ყველა სიახლე პროგრამული ხასიათისაა და განხილულია ჩვენს წინა სიახლეში iPhone OS 3.0-თან დაკავშირებით.

iPhone 3G S გაიყიდება 19 ივნისიდან, რაც შეეხება ფასს ის შემდეგი იქნება: $199 16GB მოდელისათვის და  $299 32GB-სთვის (მყიდველებს AT&T-სთან ორწლიანი ხელშეკრულების დადება მოუწევთ), ოღონდ ეს ახალი მომხმარებლებისთვის, ძველებისთვის, რაც არ უნდა გასაკვირი იყოს, ფასი უფრო მაღალი, ბევრად უფრო მაღალი იქნება! $599 16GB-სთვის და $699 32GB-სთვის და პლიუს განახლების $18. ძალიან უცნაურია, სასაცილომდე უცნაური. თუმცა სასაცილოდ ნამდვილად არ აქვთ საქმე მათ, ვინც იყიდა iPhone 3G და ახლა განახლება სურს, ასეთი კი 400,000 ადამიანია! ჩავთვალოთ ისიც, რომ iPhone 3G-ების ფასი $99-მდე დაეცა და ეს ხალხი თვის ძველ ტელეფონებსაც ვერ მოიშორებს ხელსაყრელ ფასად. Apple-ს ნამდვილად მოუწევს ამ საკითხზე ხელმეორედ დაფიქრება.

ბოლოს გთავაზობთ iPhone 3G S-ის ოფიციალურ ვიდეო მიმოხილვას:

ბეჭდვითი ვერსია