დასკვნა

და მაინც, რომელი ქულერია საუკეთესო?

რაც უნდა იყოს, ფაქტია - TRUE-ს დიდება შეირყა. მართალია, ის ტახტიდან ვერ ჩამოაგდეს, მაგრამ სახელოვან Ultra-120 eXtreme-ს მოუწევს ცოტა ჩაიჩოჩოს და გვერდით Megahalems-ი მოისვას. დიახ, მეფე... დღეიდან ორია!

რომელს აირჩევთ ამ ორიდან, მხოლოდ თქვენს გემოვნებასა და საჭიროებაზეა დამოკიდებული. გადახედეთ კიდევ ერთხელ ტესტირების შედეგებსა და ანალიზის გვერდს. წინასწარ განსაზღვრეთ, რომელ ვენტილატორს გამოიყენებთ თქვენი რჩეული ქულერისთვის, შეადარეთ ზომები (Megahalems-ი TRUE-სთან შედარებით, ოდნავ ფართოა, რაც საკმარისია, რომ ხშირ შემთხვევაში, დედა დაფის პირველი RAM სლოტი დაიფაროს. TRUE ამ მხრივ უფრო ლიბერალურია) და მხოლოდ ამის შემდეგ მიიღეთ გადაწყვეტილება.

თუ თქვენ აჩქარების მოყვარული ხართ და გსურთ თქვენი ჰაერის გაგრილებისგან მაქსიმუმი მიიღოთ უმძლავრესი ვენტილატორების გამოყენებით, მაშინ უფრო მეტს, ალბათ, TRUE მოგცემთ, ხოლო იმ შემთხვევაში, თუ საშუალოდ 1000-1600 ბრუნი/წთ ვენტილატორებით დაკმაყოფილდებით, Prolimatech-ის ქმნილების არჩევა უფრო ლოგიკური იქნება.

არა-ოვერქლოქერებისთვის როგორც ჩანს, უკეთესი არჩევანი TRUE-ა, თუმცა ეს მხოლოდ Core 2 პროცესორების პატრონებს ეხებათ. სიტუაცია Nehalem-ზე და AMD-ს სისტემებზე შეიძლება განსხვავებული იყოს.

Thermalright Ultra-120 eXtreme-სა და Prolimatech Megahalems-ს კომპინფო აჯილდოვებს "საუკეთესო წარმადობის" (Best Performance) ტიტულებით.

რაც შეეხება Thermolab Baram-ს, იგი ჩვენი აზრით, მშვენიერი ქულერია. საუკეთესო კომპლექტაცია (პრაქტიკულად სრულყოფილი, არაფრის დამატებით შეძენა საჭირო არაა. მეტიც, ვინტები ერთით მეტია კომპლექტაციაში, ვიდრე საჭიროა), კომპაქტური ზომები და მშვენიერი წარმადობა საშუალოსიჩქარიანი ვენტილატორების გამოყენებისას, იდეალურს ხდის მას ოვერქლოქერებისთვის და იმ ადამიანებისთვის, რომლებსაც ხშირად უწევთ სხვადასხვა პლატფორმების ტესტირება. Baram-ში ფასი და ხარისხი თითქმის იდეალურად ერწყმის ერთმანეთს. სწორედ ამიტომ, კომპინფოს ტესტ-ლაბორატორია Thermolab Baram-ს აჯილდოვებს "საუკეთესო შენაძენის" (Best Buy) ტიტულით.

იმედი გვაქვს, აღნიშნული ტესტირება დაგეხმარებათ თქვენთვის სასურველი ქულერის არჩევაში. ასევე, გთხოვთ, დაგვიტოვოთ კომენტარები, თქვენი აზრები ტესტირებისა და პრეტენდენტების შესახებ.